இனிக்கும் விரல்களின் சுவை

நகங்களின் விளிம்பில்
உயிர்க்கும் நீர்வண்ணங்களையும்,
உள்ளங்கையின் மையத்தில்
வான்நிறைக்கும் மீள்சிறகுகளையும்
கைவீசி கைவீசி பறக்கவிட்டு,
முகம் முழுக்க பிசுபிசுத்தபடி
இனிப்பு நிலா
மீண்டும் வேண்டுமென்கிறாள்
விரல்கள் முழுதும்
ஏக்கவண்ணங்களுடன் யாழினி...

 - தேனு

நன்றி உயிரோசை,
http://www.uyirmmai.com/ContentDetails.aspx?cid=6110

வெளியாகும் விடத்தின் ஒரு துளி

விடத்தினை ஒத்திருக்கும் பானத்தின் ஒரு துளி
நீண்டதொரு சுவாசக் கோப்பையில்
மெள்ள பயணிக்கிறது..

.

பயணத்தின் ஒவ்வொரு அடியிலும்
உயிர்ப்பின் மீள்சிறகுகளை
யதார்த்தமாய் பொசுக்கிக் கொண்டு
வெறுப்பின் உமிழ்நீரால்
இலகுவாய் வாசல் திறந்து கீழிறங்குகிறது...

.

வேதிவினை விளைவுகளால்
மாற்றத்தை உருவாக்கி
வீழ்அணுக்களை உயிர்ப்பிக்க எண்ணி
ஏமாற்றநீர்மையில் நழுவுகின்றன
துளிரன்பின் தீத்துகள்கள்..

.

உயிர்ப்பின் மையத்துளியை
நோக்கிப் பயணித்த
வார்த்தைபாணத்தின் விடத்தால்
மெள்ள மெள்ள　
நிறைகிறது சுவாசப்பை...

 - தேனு

நன்றி உயிரோசை,

http://www.uyirmmai.com/Uyirosai/contentdetails.aspx?cid=6110