கைகளில் பிசுபிசுக்கும் இனிப்பின் நிறம்

*

இனிப்பு வாங்கி உள்நுழையும் எதிர்பார்ப்பை

உடைக்க ஓரிரு சொற்களையோ கற்களையோ

என்னுள் எப்பொழுதுமே தேக்கி வைத்திருக்கிறாய்..

போதும் என்ற சொல் பந்து

மீண்டும் மீண்டும் சுவர்களில் விழுந்து தெறிக்கிறது,

படியும் காவி நிற வட்டங்கள்

அச்சொல்லின் கூட்டு எண்ணிக்கையென

பறைசாற்றிக் கொள்ள..

ஒவ்வொரு சொல்லாய்

ஒவ்வொரு சொல்லடுக்காய்

மென்மேலும் பரவி மெல்லியதொரு அறையென உருவாகும்

சொல்வன்மம் உச்சத்தை உணர மட்டும் இல்லை..

ஒரு வனத்தின் அடர்த்தியைக் கொண்ட

சொல்லறையின் கதவுகள்

யாருக்கெனவும் திறவாது என்றபடி

சொற்களைத் தின்ன துவங்குகிறது அகலவாய் கொண்ட இனிப்பு..

கதவிடுக்கு திறவும் தருணத்தில்,

தேக்கி வைத்த சொற்களையும் உண்டபடி

கை நிறைய படிந்திருக்கிறது

இனிப்பின் பிசுபிசுப்பு நிறம் மட்டும்..

*

 - தேனு

நன்றி நவீன விருட்சம்,

http://www.navinavirutcham.in/2014/06/blog-post.html

நன்றி சொல்வனம்,

http://solvanam.com/?p=33731

நாகதாளி பூமணம்

பெருமணல் வீசும் காற்றில்
பாலைத்தீ அமிழ்த்திய பெயரால் விரிகிறது
நாகதாளி வனக்கூடு..

வனவெதுப்பினும் மிஞ்சி
உயிர்த்தெழுந்த கோடுகளாய்,
கிளையிடத் துவங்கும் முறையே
மீள்கணம் நீள்வதைக் குறிப்பெடுக்க
என்றுதான் இயல்கிறது?

வெளியோடு உழன்றாடும்
சிற்றிலை ஊன்றி
மெல்ல மெல்ல வார்த்து
வண்ணமாய் நிறைகிறது
நிறம்சூடுகனி..

மணலோடும் காற்றோடும் கிளர்ந்து
வெளிக்கொணர்ந்த நிறங்களில்
உச்சிமீது வானிடியும்
காலநேரங்கள் நிழல்
துளியும் இருக்கிறதில்லை..

நிறம் மாறிய நெருப்புக்கனியின் நுனியில்
பூவாளியின் துளைகளாய் இன்னமும்
தூவிக் கொண்டிருக்கிறது முள்மழை..

- தேனு

நன்றி சொல்வனம்,

http://solvanam.com/?p=23071

தீரா வண்ணத்தில் ஒரு மலரின் உருவம்

சுளீர் சுளீர் என இரைந்து கொண்டிருந்த
அறையின் மையத்தைச்
சுற்றிலும் நீண்டிருந்த கட்டங்கள்…
அழகானதொரு விளித்தலில்
பூதாகரமாய் துவங்குகிறது
களமறியாதோர் ஆட்டம்…

நகர்தலென்பது ஒரு அடியே எனினும்
தன்னைச் சுற்றிலும்
அரணமைத்துக் காத்திருக்கும்
உருவ பொம்மைகளின் வீழ்ச்சியிலும்
நிறையவில்லை
ஊன விழிகளால் காணத்தகும் இருள்.

உணர்ச்சி மிகுதலில்
காய்கள் வெள்ளையாயும் கருப்பாயும்
எதிரிலிருக்க சில்லு சில்லாய்
வெட்டி வீழ்த்தி நகர்கிறாள்
சதுரங்க விதிகளை
அடுத்தடுத்து உடைத்து.

கட்டங்களின் நிறம் அழிந்து
வாழ்க்கைச்சதுரங்கம் கனக்க,
சிகப்பு சாயத்தில் குளித்து
கருப்புமல்லாது வெள்ளையுமல்லாது
தனித்து நிற்கிறாள்
சதுரங்க ராணி.

 - தேனு 

நன்றி சொல்வனம்,

http://solvanam.com/?p=22224